Түүвэрлэлт
Түүвэрлэлт
Цаг ашиглалтын судалгаа нь өрхөд суурилсан судалгаа тул түүврийн нэгж нь өрх юм. Хүн амын цаг ашиглалтын үзүүлэлтүүдийг үндэсний түвшинд, үүний дотор хот, хөдөө, бүсээр (Баруун, Хангай, Төв, Зүүн, Улаанбаатар) тооцооход хангалттай төлөөлөлтэй байхаар түүврийн хэмжээг тогтоосон.
Улсын хэмжээнд 4,000 өрхийг судалгаанд хамруулж, бүс тус бүрийн хувьд өрхийн тоог квадрат язгуурын аргаар тооцсон. Судалгааны мэдээллийг 4 улирлаар цуглуулдаг тул түүврийн хэмжээг 4 улиралд тэнцүү хуваарилсан.
Өрхүүдийг сонгохдоо олон шатат түүврийн аргыг ашиглав. Эхний шатанд Улаанбаатар хотоос бусад 4 бүсийг төлөөлүүлж тус бүр 2 аймгийг энгийн санамсаргүй аргаар сонгосон. Аймгуудаас сонгогдсон өрхийн тоог Хүснэгт 2.1-д дэлгэрэнгүй харуулав. Хоёр дахь шатанд түүврийн анхан шатны нэгж (ТАШН)-ийг хэмжээнд нь пропорциональ магадлалт түүврийн аргаар тодорхойлсон. Сүүлийн шатанд ТАШН бүрээс судалгаанд хамрагдах 20 өрхийг системчилсэн магадлалт түүврийн аргаар сонголоо. Судалгаанд хамрагдах өрхийн түүврийг улирал тус бүрийн мэдээлэл цуглуулалт явагдах буюу 3, 6, 9, 12 сарын эхний 7 хоногийн байдлаар Хүн ам, өрхийн мэдээллийн санд суурилж хийсэн.
